2026 жылдан бастап 11 әлеуметтік мәні бар аурудың диагностикасы ТМККК шеңберінде қолжетімді болады

2026 жылдың 1 қаңтарынан бастап ТМККК шеңберінде 11 әлеуметтік мәні бар ауруға диагностика жүргізу мүмкіндігі пайда болады. Бұған дейін тек туберкулез және АИТВ инфекциясы бойынша ғана диагностика жүргізілетін. Енді диагностикаланатын аурулардың тізіміне созылмалы вирустық гепатит, бауыр циррозы, психикалық және мінез-құлық бұзылыстары, қатерлі ісіктер, жіті миокард инфарктісі, орфандық аурулар, эпилепсия, инсульт және басқа да ауыр жағдайлар кіреді.

МӘМС жүйесіне көшу

Сонымен қатар, 2026 жылдың басынан бастап төрт әлеуметтік мәні бар ауру МӘМС жүйесіне ауысатын болады. Бұл аурулар қатарына қант диабеті, церебральдық сал ауруы, дәнекер тіннің жүйелі зақымдануы және ревматизм жатады. Аталған аурулар динамикалық бақылауға алынатын жағдайлар тізбесіне енгізіледі, медициналық көмек МӘМС шеңберінде толық көлемде көрсетілетін болады.

Тегін медициналық қызметтер

Сақтандырылмаған азаматтар медициналық көмектің негізгі пакетіне қол жеткізе алады. Оған емханаларға алғашқы өтініш, артериялық гипертензия, жүректің ишемиялық ауруы, глаукома, қант диабеті, сүт безі обыры, жатыр мойны обыры және колоректальдық обырды анықтау үшін вакцинациялау және скринингтер кіреді. Сонымен қатар, өмірге қауіп төндіретін жағдайларда жедел және шұғыл медициналық көмек, инфекциялық аурулар кезіндегі медициналық көмек, қан препараттарымен қамтамасыз ету, паллиативтік көмек және ауыр пациенттерге ұзақ мерзімді күтім жасау да қамтылған.